首页 > 名报 > 太阳报

國際邁亞密發維做大騷

2020-11-20 09:26:58
美季後明晨開波
美職季後賽聽朝正式開打,先嚟兩場資格賽,其中有「咸爺」碧咸旗下國際邁亞密登場,作客硬撼另一支美職新軍拿舒維爾。有「咸爺」做後盾,國際邁亞密今季發大嚟搞,請嚟希古恩、馬度迪等球星助陣,梗係想喺季後賽有一番作為啦,不過呢班波有前冇後堅飄忽,隨時同拿舒維爾做「大」騷。(MyTV Gold 302、Now 639、有線655及615台周六早上10時直播)

由於今季東岸比西岸多咗2隊,因此踏入季後賽階段,就要先踢一場過嘅資格賽,由第7名對第10名,同第8名對第9名,2支勝方就進入東岸最後8強。

論人氣國際邁亞密當然贏晒喇,有「咸爺」做班主,並接連簽入希古恩、馬度迪等球星,人氣更盛,射手希古恩亦坦言美職係佢職業生涯終點站,必定搏到盡。國際邁亞密憑聯賽尾輪以2比1險勝FC辛辛那提,殺入東岸第10位趕上季後賽尾班車,不過呢支星級球隊入得又失得,近14場只得1場冇失波,單計近5場入7球卻失8粒,全開3球或以上,隨時以攻代守。

拿舒維爾同樣首度征戰美職,最終位列東岸第7位,主客戰績亦差唔多。單計主場,11場取得4勝5和僅2敗,雖然勝率唔算高,但勝在硬淨唔易輸,陣中射手丹尼爾里奧斯係典型「宅男」,4個入球全部來自主場,正宗山寨王,連同蘭度爾利爾及穆卡達支援,必藉地利搶攻,2.5球入球大值捧。

衝擊攻守失衡 革命W得
早少少開波嘅另一場資格賽,由新英倫革命主場迎戰蒙特利爾衝擊。衝擊今季由前阿仙奴「大帝」亨利執教,呢位一代射手崇尚進攻,衝擊今季聯賽共轟33粒,但因攻守失衡,失波數字達43粒,係東岸失波最多球隊。反觀主隊革命攻守平衡得多,前線3叉戟布克沙、古斯達禾保奧及賓貝利,合共入18球,不容小覷。翻查紀錄,兩軍近3次交鋒,革命全部贏晒擺明格食格,主勝值得捧場。(MyTV Gold 301、Now 638、有線654及614台周六早上7時30分直播)

【元老级足球专家、篮球专家重心推介】