首页 > 名报 > 太阳报

慕遜加柏多蒙特捱細界

2020-03-07 11:59:10

對賽10連敗Vs兩硬仗跟尾
周六晚德甲壓軸戲上演前4激戰,慕遜加柏主場迎戰多蒙特,慕遜加柏對賽10連敗輸到驚,就算主場都唔敢過分搶攻;多蒙特面對今季最繁忙同最重要嘅1星期,未來幾日要應付開季至今最重要嘅兩場比賽,好難唔分心,兩軍各有顧忌,投注首選中位數3.5球細盤。

(Now 670、FOX+、有線651及611台周日凌晨1時30分直播)

慕遜加柏近9仗德甲主場8勝1和,但上次主場對賀芬咸領先後始終攞唔到保險球,最終補時被逼和跌番兩分,球隊進攻組織時好時壞,計級數始終低過拜仁、萊比錫同多蒙特,現時人腳未係爭冠材料。最慘仲係自2015年8月至今,慕遜加柏10次面對多蒙特輸晒,包括今季聯賽首循環同德國盃第2圈,擺明畀人恰死,心理冇陰影至出奇,今仗仲有主力箭頭馬古斯杜林因傷上陣成疑,相信唔敢過分急進。何況佢哋雖然落後多蒙特兩分,但仲有主場對科隆嘅補賽未踢,今仗和波對佢哋聯賽榜形勢影響唔大。

PSG史浩克等緊多蒙特
多蒙特喺艾寧夏蘭特加盟後,夾住全球搶手貨查頓辛祖,呢對19歲孖寶確實威力非凡,不過經過頻密賽程消耗,加上隊長馬高列奧斯同中場湯馬士迪蘭尼養傷,兵源削弱,球隊近期火力明顯降溫,近兩輪聯賽面對雲達不來梅同弗賴堡只能小勝,好在防線進步大,近4場正式賽事加埋只失過1球。不過今晚對慕遜加柏嘅前4大戰,對佢哋嚟講只係未來1周分量最輕嘅比賽,因為下周三晚歐聯作客對巴黎聖日耳門,固然決定8強資格,嚟緊下周末遭遇史浩克嘅魯爾區打吡戰,對多蒙特球迷嚟講更加非勝不可,今晚預期會爭取控球拖慢節奏慳體力,兩大王牌夏蘭特同辛祖亦未必踢足,隨時同慕遜加柏鬥捱「細」界。


【元老级足球专家、篮球专家重心推介】