首页 > 名报 > 太阳报

利物浦最大敵人係疫情?

2020-03-07 11:54:44

被外界視為最有機會奪取今季英超冠軍寶座嘅利物浦,上輪爆冷大敗,今季聯賽首次遇上挫折,亦終止佢哋44場不敗紀錄。「紅軍」周中足總盃作客又以0比2畀車路士淘汰,錄得今季首次2連敗。今晚重返主場迎戰般尼茅夫,對球隊上下嚟講,要好好調整心態喺主場全取3分,重振近期低迷嘅士氣。

上輪英超「紅軍」面對今季喺降班區域徘徊嘅屈福特,居然畀對手攻入3球,今場對住同樣護級心切嘅般尼茅夫,絕對唔能夠再掉以輕心。「紅軍」對上5次喺英超面對般尼茅夫全部贏晒,每場最少入3球兼不失一球,情況一面倒。般尼茅夫護級形勢危殆,需要盡力搶分,上場主場更踢出漂亮一仗逼和車路士,鬥志不容忽視。不過「般茅」今季作客極曳,近9場英超作客賽事只得1勝8負,而近7場作客賽事,亦有5場未能取得入球。

雖然利物浦手執半邊英超獎盃盃耳,但係一日獎盃未到手,始終唔能夠鬆懈。尤其依家肺炎疫情陰霾籠罩全球下,甚至傳出英超隨時因疫情而腰斬,唔少利迷都擔心愛隊首個英超冠軍夢幻滅,所以「紅軍」必須做好自己,繼續保持今季英超主場全勝佳績。


【元老级足球专家、篮球专家重心推介】